Jedna osoba je ubijena, a najmanje 11 je povrijeđeno u nedjelju u eksploziji u glavnom gradu Avganistana, Kabulu, rekao je portparol talibanske policije.
Portparol Kalid Zadran, potvrdio je ovo za Radio Azadi, avganistanski servis Radija Slobodna Evropa.
Zadran je dodao da je eksploziju prouzrokovala bomba postavljena u putnički minibus u četvrti Dašt-e Barči u zapadnom dijelu grada, gdje žive mnogi pripadnici šiitske manjine Hazara.
Nijedna grupa za sad nije preuzela odgovornost za postavljanje bombe, ali otkad su talibani preuzeli vlast u Avganistanu u avgustu 2021. godine, mnoge napade u zemlji je počinila grupa pod sunitskim vodstvom, "Islamska država Horasana" (ISIS-K).
ISIS-K je osnovan u istočnom Avganistanu 2015. kao ogranak grupe koja je zauzela velike djelove Sirije i Iraka kako bi uspostavila takozvani "kalifat".
Ova grupa često cilja talibanske zvaničnike, strance, ambasadore i hazarsku zajednicu, ali i druge za koje smatra da nisu kompatibilni sa njihovim ekstremnim tumačenjima islama.
Ova grupa je, između ostalog, odgovorna za napad na koncertnu dvoranu u Moskvi 22. marta ove godine, kada je ubijeno više od 140 osoba.
Bonus video:
