Ulcinjanin Brano Jančić ukazao je policiji na problem zbog kojeg mještani Potoka, Pinješa i Meteriza noćima nemaju miran san.
Naveo je da nije siguran da li policija mora postupiti po prijavi svakog građanina, ali da želi da da mali doprinos spokojstvu i miru od turiranja motora u večernjim i ranim jutarnjim satima.
”Postaje nepodnošljivo, a vjerujem da ima po istom osnovu prijava i drugih građana, slušati ‘turiranje’ moćnih motora, ili ‘aždaja’ kako ih zovu, na Ploči u ranim jutarnjim satima, posebno između 3 i 4. Zato vas molim da intervenišete saglasno odgovarajućim odredbama Zakona o javnom redu i miru i drugim propisima, kako biste spriječili tu pojavu u susret glavnoj sezoni”, napisao je Jančić na društvenim mrežama.
On navodi da vjeruje da se kontrolom i kažnjavanjem može postići efekat da “bučni bajkeri” tiho prođu do odredišta i da ne bude pola grada.
”To se ponavlja svako veče, godinama, ispred nekadašnjeg Vračara i čudi da se takvo ponašanje ne sprečava, jer, ovo je ipak turističko mjesto. Cijenim vaše napore po ostalim segmentima nadležnosti, ali čini se da bi ovu pošast mogli spriječiti jednom akcijom. Mnogi građani Potoka, Pinješa i Meteriza negoduju i ukazuju na ovaj problem, pa očekujem da saglasno ovlašćenjima preduzmete potrebne mjere i spriječite dalje remećenje javnog reda, a posebno, mira”, naveo je Jančić u apelu i izrazio nadu da će rezultati aktivnosti ubrzo dati rezultate.
Bonus video:
