Sveštenik Kotorske biskupije na službi u Sutomoru i Šušanju, a prije toga u Donjoj Lastvi kod Tivta, don Dejan Turza, poklonio je u danas - drugi put u posljednja dva mjeseca - Gradskoj biblioteci Tivat veliki broj odličnih knjiga, saopšteno je iz te Javne ustanove.
Uručujući najnoviju donaciju Gradskoj biblioteci, don Turza je kazao da mu je veliko zadovoljstvo što može doprinijeti radu te JU poklonjenim knjigama iz različitih oblasti i tematika.
“Nadam se da će ove knjige inspirirati ljude, potaknuti ih na razmišljanje i pružiti im uvid u različite aspekte ljudskog. Zahvaljujem se Biblioteci na srdačnom prijemu, te se radujem nastavku suradnje i budućim projektima koji će unaprijediti kulturnu scenu našeg regiona”, naglasio je don Turza, posebno se zahvaljujući na saradnji glavnom uredniku izdanja u JU Gradska biblioteka Tivat, lingvisti Miomiru Aboviću.
“Abović je istinski stručnjak u području lingvistike, čiji doprinos razumijevanju jezičke baštine Crne Gore ne može biti precijenjen. Kroz svoje angažiranje na više fakulteta i svoje istraživačke radove, Abović se ističe kao istinski akademski autoritet. Osobno sam impresioniran njegovom posvećenošću i dubinom znanja koju pruža svojim radom. Njegova impozantna pojava krije nježno očinsko srce posvećeno spašavanju pisane riječi. Iako ne razumijem sve iz lingvistike u potpunosti, uživam u svakoj prilici poslušati njegova impresivna predavanja, jer njegovo znanje i strast prema pisanoj riječi su zarazni i inspirirajući. Njegov specifičan smisao za humor, koji iznosi na društvenim mrežama, neiscrpan je i uvijek me iskreno i od srca nasmije. Osvještava anomalije u društvu na način koji ne vrijeđa, već potiče na razmišljanje. On je intelektualna gromada s dječjim čistim srcem, uvijek otvoren za istinu, hrabar da izrekne istinu, a plemenit da uvijek istakne dobro u ljudima. Naša zajednica je obogaćena njegovim djelovanjem i prisustvom", podvukao je don Turza.
Zahvaljujući se don Turzi na donaciji, ali i komplimentima koje mu je lično uputio, Abović je naglasio da će knjige koje je Turza poklonio Gradska biblioteka predstavljati u narednom periodu u okviru svoje redovne rubrike ponedjeljkom “Knjiga sedmice” na Radio Tivtu i na sajtu biblioteke.
“Pored ostalih poznatih autora, zahvaljujući donaciji don Dejana Turze, Gradska biblioteka Tivat sada je bogatija za neka reprezentativna i klasična djela književnosti i nauke koja dosad nismo posjedovali kao što su: ep 'Oslobođeni Jerusalim' Torkvata Tasa, 'Usporedni životopisi I, II, III' antičkog pisca Plutarha, 'Magija, nauka, religija i druge studije' renomiranog poljsko-engleskog antropologa Bronislava Malinovskog, 'Homo ludens' čuvenog holandskog istoričara Johana Huizinge itd.”, istakao je Abović naglašavajući da u donaciji don Dejana Turze nisu samo reprezentativna djela klasične književnosti i nauke nego i brojni odlični naslovi savremene regionalne i svjetske književnosti, te nauke, filozofije i teologije.
“Ovom donacijom saradnja između Gradske biblioteke Tivat, sa jedne strane, i don Dejana Turze, sa druge, ne završava se, citirajući njegove riječi, mogu reći da je ovo tek početak sinergije i rada na našim budućim zajedničkim projektima. Radujemo se što u našem društvu još uvijek ima ljudi kao što je don Dejan: ljudi koje najpreciznije možemo opisati kao osviješćene pojedince koji u potpunosti razumiju ogroman značaj kulture i doprinosa opštem dobru; dao Bog da u našoj zajednici vremenom bude sve više ljudi kao što je don Dejan”, istakao je glavni urednik JU Gradska biblioteka Tivat Miomir Abović.
Bonus video:
