Lider najvećih makedonskih stranaka nisu uspjeli da pronađu način za prevazilaženje političke krize koja već sedmicama potresa tu državu, pa su socijaldemokrate Branka Crvenkovskog najavile "radikalizaciju" protesta.
Poslije jednočasovnog sastanka, premijer Nikola Gruevski izjavio je da je Crvenkovski nastupio ultimativno, zahtijevajući vanredne parlamentarne i lokalne izbore, što je za vlast neprihvatljivo.
Premijer je rekao da njegova partija ne prihvata ni to da se predsjednički izbori održe istovremeno sa parlamentarnim.
VMRO-DPMNE izaći će na lokalne izbore, jer, kako je rekao, SDSM nije jedina opoziciona stranka u Makedoniji.
Lider SDSM Branko Crvenkovski rekao je da je na sastanku insistirao na održavanju prijevremenih parlamentarnih izbora, i to je uslov da se poslanici iz njegove partije vrate u Sobranje.
Prema njegovim riječima, Gruevski je na sastanku nastupao kao da se ništa nije dogodilo 24. decembra, pa je predložio opoziciji da se vrati u parlament i da se dijalog nastavi tamo gdje je toga dana zaustavljen.
Crvenkovski je podsjetio da su toga dana, prilikom usvajanja budžeta, poslanici opozicije nasilno izbačeni iz Sobranja.
Crvenkovski je rekao da je Makedonija u političkoj krizi i da je izlaz iz nje u parlamentarnim izborima, na kojima će građani odlučiti u kom pravcu će zemlja ići u budućnosti.
Bonus video:
