Češki premijer Bohuslav Sobotka osudio je danas pokušaj češkog predsjednika Miloša Zemana da bude duhovit porukom da ko od Čeha neće da čeka izbore može da se riješi premijera kalašnjikovom, a predsjedniku je najviše zamjerio što mu plaši djecu i porodicu.
"Velika je vjerovatnoća da smo jedina civilizovana zemlja u kojoj predsjednik javno poziva ljude da ubiju predsjednik vlade. Ja ću sa tim izaći na kraj ali smeta mi što time Zeman plaši moju djecu, cijelu porodicu i prijatelje", kazao je Sobotka za onlajn izdanje dnevnika Pravo.
Češki premijer dodao da je da su takve izjave glupe, nepotrebene i da neće na njih dalje da reaguje a da nastavlja da se u odnosima sa šefom države ponaša profesionalno u interesu države.
Iako su u Češkoj i javnost i političari navikli da predsjednik Zeman nastoji da bude po svaku cijenu duhovit, takva neslana šala ih je ipak šokirala i osudili su je kao nedopustivu, neukusnu histeriju i dolivanje ulja na vatru složno političari sa svih strana političkog spektra, a zajedno su je zajedničkim zvaničnim saopštenjem osudili šefovi oba doma češkog parlamenta.
"Takve izjave samo ruše političku kulturu i komunikaciju medju zvaničnicima a mogu da podstiču jačanje tenzija i mržnje u društvu. Zvaničnici bi trebalo da spreče širenje haosa i straha koji u sadašnjoj izbjegličkoj krizi izazivaju ksenofobi i rasisti", saopštili su šef Poslaničkog doma Jan Hamaček i Senata češkog parlamenta Milan Šteh.
Portparol predsjednika Zemana Jirži Ovčaček nastoji cio dan bez uspjeha da objasni posredstvom medija da je to predsjednik kazao samo kao šalu i kao demokrata u duši, jer je želio da upozori Čehe da treba da idu na izbore, jer su oni jedina demokratska varijanta promjene premijera.
Bonus video:
