U sporu oko britanske enklave Gibraltara, došlo je do novih varnica između Madrida i Londona. Velika Britanija razmišlja o tužbi, rečeno je u kabinetu britanskog premijera Dejvida Kamerona.
Izuzev najave o eventualnom pokretanju tužbe, britanska javnost, barem za sada, ostala je uskraćena za detalje o konkretnim mjerama, koje London namjerava da preduzme protiv Madrida. Velika Britanija bi u svakom slučaju u spor mogla da uključi Evropsku komisiju ili pak Evropski sud pravde.
Do zaoštravanja odnosa došlo je uslijed pojačane granične kontrole na Gibraltaru, koja je dovela do višesatnog čekanja putnika. Britanska vlada posebno oštro odreagovala je na najave iz Madrida, koji razmišlja u uvođenju takse za prelazak granice. Za London su takve mjere neprihvatljive, čak i „ilegalne“.
Foto: Reuters
U kojoj mjeri su odnosi sa Španijom narušeni, potvrđuje i podatak da je u ponedjeljak ujutru iz Londona krenula flota od deset britanskih brodova, među kojima i čuvena fregata Vestminster.
Navodno je razlog za slanje brodova u mediteranske vode uobičajena vježba, ali je trenutak za vojne manevre britanskih brodova daleko od svojih teritorijalnih voda, isuviše dvosmislen.
Foto: Beta/AP
Ministarstvo odbrane u Londonu negira da je vojne vježbe inicirao spor sa Madridom, navodno je riječ o „rutinskom obilasku Gibraltara“. Britanski mediji izvještavaju drugačije, možda je upućivanje flote simboličnog karaktera, ali cilj je ipak nešto drugo.
"To što će se u Gibraltaru sa brodova zavijoriti britanska zastava, poruka je za tamošnje građane – mi smo uz Vas!“
Čiji ribari imaju pravo na veći ulov?
Spor oko Gibraltara postao je ponovo aktuelan kada je britanska administracija odlučila da postavi vještački greben u vodi, kako bi tamošnji ribari mogli da računaju na veći ulov.
Španija je negodovala navodeći kako se postavljanjem betonskih blokova nanosi šteta španskim ribarima. Neposredno nakon toga započinje politička igra dva susjeda.
Foto: Beta/AP
Opsežne kontrole na granici koji primijenjuju španski graničari, dovode do ogromnih kolona i višečasovnog čekanja na prelazu. Kap koja je prelila čašu bila je najava Madrida kako će uvesti taksu za svaki prelazak granice u iznosu od 50 eura.
Fabian Pikardo, šef britanske administracije na Gibraltaru kritikuje, kako kaže, zveckanje oružjem Španaca. „Ovo me više podsjeća na politiku Sjeverne Koreje, nego da dobrosusjedske odnose sa partnerom iz EU“, kaže Pikardo.
Foto: Beta/AP
U razgovorima sa španskim kolegom Rahojem, britanski premijer Kameron poručio je kako su kontrole i čekanja na granici neprihvatljive. Doduše, zaključak sa tog sastanka, izrečen pred televizijske kamere bio je, da su London i Madrid zajednički tragaju za rješenjem spora nastalog postavljanjem jveštačkog grebena.
Hoće li spor završiti pred Savjetom bezbjednosti UN?
Uprkos diplomatskoj razmjeni mišljenja na susretu dva premijera od prošle sedmice, situacija se dodatno zaoštrila, kada je španski dnevnik „El Pais“ objavio izjavu šefa španske diplomatije, u kojoj se navodi, kako bi Madrid pitanje Gibraltara mogao da pokrene pred SB UN, zajedno sa Argentinom i pitanjem Folklandskih ostrva.
Navodno će o tome biti riječi na susretu dva ministra u septembru u Buenos Ajresu.
Foto: Beta/AP
Gibraltar je od 1713. godine u rukama Velike Britanije. Na referendumu organizovanom 2002. velika većina građana od ukupno 30.000 žitelja Gibraltara, izrazilo je želju da ostane prekomorska teritorija Ujedinjenog Kraljevstva.
Zanimljivo je da među stanovnicima Gibraltara najviše ima ljudi portugalskog, italijanskog, španskog i marokanskog porekla.
Galerija
Bonus video:
