Jedna od 39 žrtava sinoćnjeg napada u Istanbulu bio je i Fatih Čakmak koji je početkom decembra izbjegao smrt kada su eksplodirale bombe kod stadiona Bešiktaša, pišu danas turski mediji, a prenosi "Blic".
Čakmak se 10. decembra nalazio na mjestu napada kod stadiona Bešiktaša kada su odjeknule dvije bombe - prva kada je u vazduh odletio automobil napunjen ekplozivom i druga, nekoliko sekundi kasnije kada se raznio bombaš samoubica.
Napad se dogodio dva sata nakon okončanja utakmice između Bešiktaša i Bursaspora, a prema riječima turskog ministra unutrašnjih poslova Sulejmana Sojlua meta napadača bio je autobus sa pripadnicima policije za razbijanje demonstracija.
Čakmak tada nije povrijeđen iako se nalazio na mjestu napada, ali u napadu u novogodišnjoj noći u klubu "Reina" bio je među prvima koji su stradali.
Prema navodima turskih medija, Čakmaka i jednog policajca napadač je ubio na ulasku u klub prije nego što je unutra počeo nasumice da puca po gostima lokala, prenosi "Blic".
Za napad kod stadiona Bešiktaša odgovornost je preuzela militantna kurdska grupa "Jastebovi slobode Kurdistana" (TAK), koja se otcojepila od Radničke partije Kurdistana (PKK).
Za masakr u novogodšnjoj noći niko još zvanično nije preuzeo odgovornost, mada mediji pišu da su napadači navodno razgovarali na arapskom jeziku, aludirajući na mogućnost da iza napada stoji Islamska država.
Bonus video:
