Predsjednik SAD Donald Tramp bio je pun hvale o crvenim tepisima, vojnim paradama i raskošnim večerama koje su priređivane u njegovu čast prilikom posjete Aziji.
Međutim, on tokom svoje prve godine na vlasti nije bio takav domaćin nijednom stranom predsjedniku ili premijeru, navodi AP.
On je prvi američki predsjednik poslije skoro stotinu godina koji prvu godinu mandata privodi kraju, a da nijednog stranog kolegu nije pozvao u državnu posjetu SAD, primjećuje američka agencija, uz napomenu da su državne posjete važno diplomatsko sredstvo koje podrazumijeva svečano upriličen dolazak gosta i raskošnu večeru u Bijeloj kući.
Portparolka Bijele kuće Sara Hakabi Sanders kaže da ne postoji "poseban razlog" zašto Tramp tokom svoje prve godine predsjedničkog mandata još nikome nije uputio poziv za državnu posjetu, ali dodaje da se administracija nada da će takva posjeta biti zakazana već početkom 2018, piše Tanjug.
Ona, međutim, nije nagovijestila kog stranog kolegu bi Tramp mogao da uzme u obzir za ukazivanje diplomatskih počasti.
Tramp je kao predsjednički kandidat s prezirom govorio o državnim večerama kada je kritikovao odluku bivšeg predsjednika Baraka Obame da kineskog predsjednika Si Đinpinga pozove u državnu posjetu.
"Ne bih ja njemu (Siju) priredio večeru. Vodio bih ga u Mekdonalds na hamburger i rekao bih mu da moramo da se bacimo na posao", govorio je Tramp tada.
Prošlog mjeseca je, međutim, baš Si odmotao crveni tepih Trampu u čast, obasipajući ga u Pekingu spektakularnim prizorima tokom državne posjete kojom je američki predsjednik bio oduševljen, a u sličnim posjetama je tih dana bio i u Južnoj Koreji i Vijetnamu.
Poziv za državnu posjetu je po pravilu znak prijateljstva i primjer strateških veza između zemalja koje su važne jedna drugoj, kaže Anita Mekbrajd, bivša članica tri republikanse administracije, koja je bila i šef osoblja nekadašnje prve dame Laure Buš.
Trampova odluka da nikoga još ne pozove u državnu posjetu možda djelimično ima veze s tim što je njegova prva godina na vlasti bila haotična, a osim toga, prva dama - koja je odgovorna za planiranje državne večere do najsitnijih detalja - tek se u junu zvanično preselila u Bijelu kuću, objašnjava Mekbrajd.
Ona navodi i da je državna posjeta pozamašan poduhvat, a da Tramp upravlja zemljom s jedva dovoljnim osobljem.
Tramp se u Bijeloj kući sastao sa mnogim stranim kolegama, ali nijednog nije primio u državnu posjetu, napominje američka agencija.
Zato će prvi strani visoki državnik koji dođe u državnu posjetu Trampu biti zaista važan, "a drugi svjetski lideri će obratiti pažnju na to", zaključuje Mekbrajd.
Bonus video:
