Hrvatska glumica Leona Paraminski koju je crnogorska publika upoznala u seriji “Budva na pjenu od mora” kroz ulogu atraktivne Mile, već godinama živi i radi u Americi.
Otkako se prije pet godina preselila u SAD, Leona Paraminski ne krije da je proširila horizonte, ali i da su joj se otvorile nove poslovne mogućnosti. Osim što predaje glumu na koledžu u Santa Barbari, i dalje glumi, a priznaje da se u Los Angelesu teško dolazi do angažmana, pogotovo onih koji nešto vrijede. Kako kaže u intervjuu za Tportal pred njom je još puno toga što želi da ostvari, a tvrdi da je “američki san” zapravo velika laž.
“Američki san zapravo ne postoji. Ono što je Amerika bila nekad, danas više nije. Tako da ne mogu reći da sam zaluđena Amerikom, pokušavam uzeti samo najbolje, puno sam naučila, puno toga mi se ostvarilo kao i Tinu, ali nisam još ostvarila svoje snove, ono što sam mislila da bih htjela. Mislim da će za to doći vrijeme. Vidjećemo, dajte mi još tri, četiri godine’, poručila je kroz smijeh.
Američka filmska mašinerija, kaže, još ne radi punom parom. “U Americi su strašno velike regulative, sve jako puno košta i radiće samo veliki studiji, veliki blockbusteri i to će raditi najveće zvijezde. Ja sam prije lockdowna odradila nekoliko audicija i nakon toga više nisam radila ništa”, priznaje.
Došla je, smatra, u neke godine kad bi htjela da radi samo stvari koje je zanimaju i misli da više nikad neće raditi tempom kakav je imala s dvadeset, trideset godina. Uoči svog 40. rođendana, Leona će se vratiti u Ameriku. Tokom pandemije provodila je vrijeme sa suprugom Tinom Komljenovićem, a karantin joj je prijao. O tome kakva je situacija u gradu gdje živi i radi, kaže:
“U Santa Barbari je sad malo bolja situacija. Zatvoreni su restorani, a maske su svuda obavezne tako da se to poštuje jer su kazne velike, mislim da su oko hiljadu dolara. Ja sam se navikla da je jednostavno moram nositi. Mislim da je to neki novi način života”, istakla je glumica.
Bonus video:
